MAGKAKAPATID : Cinemalaya Audience Choice Award (2010)

Sa di sinasadyang pagkakataon ay napanood ko sa Cinema One ang MAGKAKAPATID Cinemalaya finalist for New Breed Category.

Ito ang halimbawa ng isang pelikulang may nakababasag na katahimikan lalo na sa unang 15-minuto nito. May takot na bumalot sa aking katawan at na-hook sa kakaibang kwento nito.

Isang family drama na naglalahad ng tatlong buhay ng magkakapatid (Julio Diaz, Ces Quesada at Raquel Villavicencio) na may sari-sarili ng pamilya.  Nahabi ang kwento sa mga anak nito kung saan ang away-magkapatid (Nico Antonio atBanaue Miclat) ay nauwi sa patayan, dalagang hindi matanggap ng ama ang pag-aasawa (Mercedes Cabral) at ang pigil na pagdadalamhati ng isang anak (Kathlyn Castillo) sa pagkamatay ng ama. Pinagbuklod ng tadhana,  ang sunod-sunod na trahedya ay mahirap pigilan ng sinuman.

 

Nanalo bilang Audience Choice Award sa 2010 Cinemalaya, sa panulat at direksyon ni Kim Homer Cabaguio Garcia – ito ang pelikulang may kakaibang sangkap sa pagkakagawa. Ibang klase ang dulot nitong takot sa manonood at sobrang epektibo ang pagganap ng mga pangunahing tauhan lalo na ang nagbali-baliwang Nico Antonio – bakas sa mukha nito ang naturalisang pag-arte,  ang tahimik at masakiting ina na si Ces Quesada – na ramdam mo ang pighati ng kalooban,  at ang galit ni Julio Diaz bilang tiyuhin at kapatid. Tagos sa puso ang inilahad at ipinaramdam ng pelikulang ito na hindi

mo basta-basta maiwawaksi sa iyong isipan pagkatapos mong mapanood.

 

Maganda at Maayos.
Malinis at Magaling.

Magkakapatid.

Rating: 4/5